Gjykata e Lartë ka pranuar rekursin e Arbër Veliajt, i cili kundërshtoi kontrollet e kryera në banesën dhe zyrën e tij në dhjetor të vitit 2024. Trupa gjykuese vendosi të kthejë çështjen për rigjykim në Gjykatën e Apelit, me të njëjtën trupë gjykuese.
Kontrollet u kryen nga Prokuroria e Posaçme (SPAK) në banesat dhe bizneset e Arbër Veliajt, vëllai i kryetarit të Bashkisë Tiranë, Erion Veliaj, i cili ndodhet aktualisht në masë sigurie “arrest me burg”, nën dyshimet për korrupsion dhe pastrim parash.
Gjatë operacionit të dhjetorit, u ushtruan kontrolle edhe në ambientet e zyrës juridike dhe të një organizate joqeveritare ku u sekuestrua celulari i Ajola Xoxës, bashkëshortja e Erion Veliajt.
Çifti po hetohet për korrupsion dhe pastrim parash. Nën hetim ndodhen gjithashtu edhe gjashtë biznesmenë të tjerë.
