Gjykata e Lezhës ka vendosur masën e sigurisë "detyrim paraqitje" për Ladi Ndojën – bashkëshort i deputetes së Partisë Demokratike, Elda Hoti – si dhe për Amarildo Jushin dhe një tjetër të ndaluar, të cilët u arrestuan mbrëmjen e së shtunës (10 maj 2025) për disa vepra penale të lidhura me zgjedhjet.
Treshja akuzohej për veprat penale “Pengimi i qarkullimit të mjeteve të transportit”, “Drejtimi i automjeteve në mënyrë të parregullt”, “Vetëgjyqësia” dhe “Kanosja apo dhunimi ndaj pjesëmarrësve në zgjedhje”.
Sipas njoftimit zyrtar të Policisë, ngjarja ndodhi rreth orës 20:20 në Rrëshen, ku shtetasit në fjalë, me dy automjete, dyshohet se i kanë bllokuar rrugën një automjeti të drejtuar nga Renuar Kola, 46 vjeç, drejtor i arsimit në Rrëshen, dhe pasagjerit A.D. Sipas deklarimeve, ndalimi u bë me pretendimin se këta të fundit ishin duke u përfshirë në blerje votash.
Pas kontrollit të ushtruar në automjetet e Ladi Ndojës dhe Amarildo Jushit, policia ka gjetur dhe sekuestruar lista me të dhëna personash – të dyshuara si lista zgjedhësish. Ndërkohë, në automjetin e Renuar Kolës nuk u gjet asnjë send i kundërligjshëm.
Vendimi i Gjykatës së Lezhës për të mos i mbajtur në paraburgim të dyshuarit ka sjellë reagime të ndryshme në opinionin publik, veçanërisht për shkak të lidhjes së njërit prej tyre me politikën.
Hetimet për ngjarjen vijojnë.
