Policia e Shtetit ka përfunduar me sukses një operacion ndërkombëtar kundër krimeve kibernetike, i koduar “Platforma”. Operacioni është zhvilluar në bashkëpunim me SPAK-un dhe me mbështetjen e Europol-it dhe Eurojust-it, ndërsa janë përfshirë disa shtete si Gjermania, Shqipëria, Qipro dhe Izraeli.
Në Shqipëri, kontrollet janë kryer nga Drejtoria për Hetimin e Krimeve Kibernetike dhe Forca e Posaçme Operacionale, në zbatim të vendimeve të Gjykatës së Posaçme. Gjatë operacionit në Tiranë, janë ushtruar kontrolle në tre ambiente të ndryshme, ku janë sekuestruar:
- 2 telefona celularë
- 1 laptop
- 1 kompjuter
- 1 USB
- 1 hard disk i jashtëm
- 40 020 euro
Operacioni është pjesë e një hetimi ndërkombëtar të nisur nga autoritetet gjermane për një grup të organizuar kriminal, i cili dyshohet se ka mashtruar më shumë se 100 persona, duke u marrë mbi 3 milionë euro përmes një platforme të rreme investimesh online.
Policia e Shtetit deklaron se do të vazhdojë bashkëpunimin me partnerët ndërkombëtarë për të goditur grupet kriminale që veprojnë në fushën e mashtrimeve financiare dhe krimeve kibernetike. Hetimet për këtë rast janë ende në vijim.
