Gjykata e Korçës ka caktuar masën e sigurisë “arrest me burg” për Andi Shkullakun, duke e çuar në pesë numrin e personave të arrestuar në lidhje me vrasjen e Egli Progës, ngjarje që tronditi qytetin e Pogradecit disa muaj më parë.
Andi Shkullaku u ndalua tre ditë më parë me urdhër të Prokurorisë së Korçës, nën akuzën e moskallëzimit të krimit. Sipas hetimeve paraprake, ai ka qenë i pranishëm në momentin e ngjarjes kur Egli Proga u dhunua për vdekje, por më pas është larguar pa dhënë deklaratë në polici.
Për vrasjen e të riut janë vënë në pranga: Denis Meçe, Leonidha Guçe, Voltan Shkullaku, Arjan Manellari dhe së fundi, Andi Shkullaku.
Prokuroria e Korçës, pas administrimit të provave të reja dhe analizës së pamjeve filmike të siguruara nga serverat e kamerave të sigurisë në zonë, pritet të bëjë ndryshim të akuzave për të paktën dy nga të arrestuarit. Burime pranë organit të akuzës bëjnë me dije se Leonidha Guçe do të hetohet tashmë për “vrasje me dashje”.
Kujtojmë se Guçe u akuzua si autor i ngjarjes që ditën e parë nga motra e viktimës. Dëshmia e saj, e mbështetur më vonë edhe nga deklarimi i Andi Shkullakut dhe provat e administruara nga kamerat e sigurisë, ka luajtur një rol të rëndësishëm në thellimin e hetimeve.
Prokuroria njofton se brenda javës së ardhshme do të përfundojë komunikimin e akuzave të reja dhe do ta çojë dosjen në gjykatë për seancën paraprake. Burime nga organi i akuzës thonë gjithashtu se motra e viktimës ka qenë një nga nxitëset kryesore të hetimit, duke ofruar informacione dhe kërkuar thellimin e pistave të ndryshme që, në vijim, janë kthyer në prova konkrete për zbardhjen e ngjarjes.
