Roven Zeka, shef i Drejtorisë së Qarkullimit Rrugor në Tiranë, një prej miqve më të ngushtë të Drejtorit të Përgjithshëm të Policisë së Shtetit, Ilir Proda, përfundoi në pranga, nën dyshimet për veprën penale të korrupsionit. Ai u ndalua të shtunën në mesditë me urdhër të Prokurorisë së Posaçme. SPAK lëshoi urdhër arrest edhe për vartësin e tij, Sokol Novaku, shefi i sektorit të aksidenteve, po ashtu lidhje e afërt e Prodës, dhe Edison Tabakun, oficer i policisë së qarkullimit rrugor.
Hetimet zbuluan se Zeka, në bashkëpunim me dy vartësit, përfituan ryshfet nga një grua, e cila ishte përfshirë në një aksident rrugor. Roven Zeka u emërua në krye të qarkullimit pas ardhjes së Prodës si kryepolic. Një nga rastet e rënda, që u shkaktua gjatë kohës së shkurtër të qëndrimit në këtë detyrë, është tentativa e vetëvrasjes së policit që ndaloi djalin e biznesmenit Samir Mane, ngjarja e cila u mbyll pa jehonë në media dhe dëshmoi implikimin e Policisë së Qarkullimit.
