Sipas një dokumenti parlamentar të siguruar nga VNA, Kryetari i Komisionit për Nismat Qytetare, Bashkëpunimin dhe Mbikëqyrjen Institutionale, Fatmir Xhafaj, ka hartuar kalendarin e punës për periudhën shtator-tetor 2026. Plani parashikon një agjendë mjaft ngjeshur me 20 mbledhje, seanca dëgjimore dhe inspektime në terren, përmes të cilave synohet të vihen në rresht dhe t'u kërkohet llogari krerëve të dikastereve kryesore të qeverisë dhe institucioneve të drejtësisë. Mirëpo, prapa këtij zelli procedurial fshihet një amulli e madhe: çështja më kritike dhe më e ndjeshme, ajo e sigurisë fizike në gjykata, është lënë pa asnjë afat kohor.
Qeveria dhe agjencitë "në rresht" nga shtatori në tetor
Dokumenti i siguruar nga VNA tregon se turi dëgjimor nis më 14 shtator. Në këtë fushatë mbikëqyrëse janë përfshirë agjenci ekzekutive me peshë si Autoriteti Kombëtar për Sigurinë Kibernetike, Agjencia e Administrimit të Pronave të Konfiskuara, IdentiTEK, Agjencia e Prokurimit Publik, Tatimet, Doganat, si dhe Drejtoria e Përgjithshme e Burgjeve.
Agjenda vijon në fund të shtatorit me inspektime direkte në terren (Pogradec, Qafë Thanë, IEVP Peqin) dhe arrin kulmin në tetor me seanca të gjata dëgjimore për kontrollin post-legjislativ. Përpara komisionit të Xhafajt janë thirrur të raportojnë pothuajse të gjitha ministritë kryesore (Arsimi, Shëndetësia, Punët e Brendshme, Mbrojtja, Drejtësia, Financat, Infrastruktura), si dhe drejtuesit e institucioneve të pavarura të sistemit të drejtësisë si KLGJ, KLP dhe ILD.
Fjalë shumë, por zgjidhja lihet pa datë
Më shumë se një vit nga ngjarja tragjike ku gjyqtari Astrit Kalaja u ekzekutua brenda sallës së gjyqit — një ngjarje tronditëse që ekspozoi cenueshmërinë extreme të trupës gjyqësore — pritej që komisioni parlamentar të ofronte zgjidhje konkrete ligjore e infrastrukturore.
Por, sipas kalendarit zyrtar, pika e 20-të dhe e fundit e rendit të ditës mban titullin:
"Tryeza e përbashkët tre palëshe në kuadër të kërkesës së KLGJ 'Mbi sigurinë në gjykata'".
Ajo që bie menjëherë në sy në dokumentin e siguruar nga VNA është se, ndërsa çdo mbledhje tjetër ka një datë të përcaktuar qartë nga 14 shtatori deri më 19 tetor, kjo pikë — e cila përfaqëson shqetësimin më vital për jetën e gjyqtarëve — nuk ka asnjë date të vendosur.
Xhafaj e nisi këtë proces me zell të madh inspektues, duke i shtrirë verifikimet nga zyrat e administratës e deri te deputetë që shfaqeshin në gjykata e prokurori duke matur me sy eksperti sigurie gjendjen e godinave. Mirëpo, kur vjen puna te marrja e përgjegjësive për të ofruar zgjidhje reale për sigurinë në sistemin gjyqësor, komisioni duket se nuk është gati të kalojë nga fjalët te veprat.
Lënia e kërkesës së Këshillit të Lartë Gjyqësor pa asnjë afat dhe në fund të kalendarit ngre supozime se siguria e gjyqtarëve vazhdon të trajtohet si një çështje dytësore. Dokumenti i siguruar nga VNA dëshmon se, me gjithë kalendarin e ngjeshur me 20 mbledhje, zgjidhja për sigurinë në gjykata mbetet sërish e pezulluar dhe e lënë në mëshirë të fatit.
