Artan Tafani, i penduari i drejtësisë që ka zbuluar krimet e kryera nga banda e Laert Haxhiut, ka rrëfyer edhe për vrasjen e Elton Mermalit, i njohur edhe si Alban Semaku.
Sipas dëshmisë së tij, Mermali u ekzekutua për motive hakmarrjeje, pasi kishte qenë pjesë e bandës së Aldo Bares. Laert Haxhiu, i konsideruar si një nga kundërshtarët e përbetuar të kësaj bande, dyshohet se urdhëroi vrasjen. Ndërkohë, Aldo Bare po vuan një dënim me burgim të përjetshëm për krime të rënda të kryera si pjesë e bandës së Lushnjës.
Aktualisht, Laert Haxhiu po gjykohet veçmas nga pjesëtarët e tjerë të bandës së tij, të cilët janë: Lulzim Spahija (i njohur si Arapi), Artan (Marjus) Tafani, Ligor Romacka, Bledar Berberi, Erisiano Abedini, Mariglen Topuzi, Enriko Xhahysa, Bujar Abedini dhe Idriz Manej.
Dëshmia e Tafanit për vrasjen e Elton Mermalit
“Elton Mermalin donte ta vriste Laerti, sepse thoshte: ‘Ka marrë pjesë te vrasja e çunit të xhaxhait tim’. Ma kishte shpjeguar këtë përpara se të ndodhte vrasja. I pranishëm ka qenë edhe Lulzim Arapi kur e ka thënë këtë. Sipas Laertit, Mermali kishte qenë prezent kur u vra djali i xhaxhait të tij.
E kam njohur Mermalin në burgun e Rrogozhinës, ku fillimisht ishte mirë, por më vonë filloi të pinte. Laerti kishte mendimin se Mermali ishte pjesë e bandës së Aldo Bares dhe se sapo kishte dalë nga burgu, ishte përdorues droge. Unë e njihja personalisht, sepse kemi qenë në paraburgim bashkë.
Në një moment, Laerti na dha urdhër: ‘Nisuni për në Lushnjë, do të presësh Elton Mermalin’. Na dha edhe 300 euro për rrugën”, tregoi Tafani.
“Shkova me Lulzimin në Lushnjë. Kaluan përmes Peqinit dhe kërkuam një vend të përshtatshëm për ta vrarë, nën ura. Për çdo gjë flisnim me Laertin, ai na jepte urdhra.
E kërkova Mermalin përreth, derisa e gjeta përpara shtëpisë së tij. I thashë: ‘Hajde, më ndiq nga pas’. U ngjitëm në makinë dhe shkuam te shtëpia ime, ku ndodhej edhe Lulzimi. I thashë Eltonit se do të shkonim të merrnim një mik dhe një ‘mall’ që i kisha premtuar.
U nisëm bashkë – Lulzimi përpara, ne mbrapa. E çuam në një vend të fshehtë në mes të ferrave. Sapo mbërritëm, i qëllova unë i pari me një plumb dhe vrapova. Pastaj e qëlloi edhe Lulzimi me dy plumba të tjerë. Arma ishte me silenciator dhe ma kishte dhënë Lulzimi.
U ngjitëm në makinë dhe ikëm. Unë isha në timon. I thashë: ‘Mere armën dhe çmontoje’. Gjatë rrugës nga Peqini në drejtim të Elbasanit, teksa po i hiqte fishekët, arma shkrep pa dashje dhe Lulzimi plagoset në këmbë, te gishti. U panikuam.
Te ura e Rrogozhinës hodha silenciatorin dhe fishekët që kishin mbetur. Më pas, e çova Lulzimin në Tiranë, ndërsa unë u ktheva në Lushnjë. Fola me Laertin dhe i tregova çfarë ndodhi. Ai më tha të merrja ilaçe për ta mjekuar”, përfundon Tafani.
Sipas tij, policia nuk e gjeti armën e përdorur në vrasje. “Lulzimi më tha: ‘Është gjetur trupi i viktimës’”, shton Tafani.
“Po udhëtoja nga Tirana drejt Durrësit, nga rruga e Ndroqit, kur ndalova në një restorant. Aty ishin Bledari dhe Laerti, bashkë me dy të tjerë. Ishin policë. Njëri prej tyre ishte inspektor në Elbasan, po hanin drekë”, përfundon i penduari.
