Në GJKKO po vijon procesi për rrëmbimin dhe zhdukjen e Jan Prengës, me të pandehur: Dritan Rexhepin, Gentian Doci Funiqin, Aldo Majnishtën, Geraldo Martinin, Korado Geshtenjën, Martin Bletën dhe Aldo Docajn.
Në nisje të seancës, gjykata relatoi një letërporosi që ka mbërritur në Shqipëri për marrjen në pyetje si dëshmitarë të Astrit Prengës, vëllai i Jan Prengës, dhe Gëzim Shullanit.
“Para se të rishqyrtojmë kërkesën tuaj, duam të dimë statusin penal të personave që do dëshmojnë, detaje mbi pyetjet që do t’u jepen, shpjegime mbi akuzat për të cilat duhen marrë në pyetje dëshmitarët, si dhe sesi mund të shërbejë dëshmia e tyre në hetimin e SPAK.
Të ngarkohet policia britanike për të bërë pyetjet që autoritetet shqiptare do të na vënë në dispozicion”, thuhet në letërporosi.
Astrit Prenga është protagonisti kryesor në ngjarje, pasi bashkë me grupin e tij grabiti një sasi të madhe droge në Britaninë e Madhe që i përkiste Rexhepit dhe Gentian Docit Funiqit.
