Dy persona janë arrestuar në Tiranë, pasi akuzohen për mashtrim përmes një aktiviteti të jashtëligjshëm call center-i.
Operacioni policor i koduar “Last call” u finalizua nga Specialistët e Seksionit për Hetimin e Krimeve Ekonomike dhe Financiare në DVP Tiranë, në bashkëpunim me Forcën e Posaçme për Operacionet Speciale dhe Kërkimin, pas një hetimi të thelluar.
Në kuadër të këtij operacioni, u arrestuan në flagrancë shtetasit:
- O. V., 35 vjeç,
- A. B., 32 vjeç,
të dy banues në Tiranë.
Nga hetimet rezulton se këta persona administronin një subjekt të palicencuar në zonën e Rrugës së Barrikadave, me aktivitet të padeklaruar në organet kompetente. Ata kishin përshtatur ambientin si call center dhe, në bashkëpunim me njëri-tjetrin, telefononin shtetas të huaj, duke i mashtruar për të investuar në bursa fiktive.
Të ardhurat e përfituara në këtë mënyrë dyshohet se ishin të konsiderueshme, ndërsa hetimet vijojnë për identifikimin e personave të tjerë të përfshirë dhe gjurmimin e pasurive të mundshme të përfituara në mënyrë të paligjshme.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme.
