Agjencia ndërkombëtare e lajmeve Reuters i ka kushtuar një artikull zhvillimeve të fundit politike në Kosovë, duke vënë në dukje se Albin Kurti është rizgjedhur kryeministër, por vendi mund të përballet sërish me zgjedhje të parakohshme nëse Kuvendi dështon të zgjedhë presidentin e ri.
Kurti u zgjodh në krye të qeverisë me 62 vota në Kuvendin e Kosovës, i cili ka 120 deputetë. Përpara votimit, ai deklaroi se mandati i ri do të fokusohet në forcimin e sigurisë dhe rritjen e mirëqenies së qytetarëve. “Ky mandat ka të bëjë me rikthimin e fuqishëm të sigurisë dhe prosperitetit për qytetarët”, tha Kurti, duke shtuar se zgjedhjet e përsëritura kanë penguar funksionimin normal të institucioneve.
Reuters thekson se sfida e radhës për institucionet e Kosovës është zgjedhja e presidentit. Në fund të gushtit, Kurti arriti një marrëveshje me Lidhjen Demokratike të Kosovës për mbështetjen e profesorit Bekim Sejdiu për postin e presidentit. Megjithatë, vetëm një ditë më vonë, gjashtë deputetë të LDK-së deklaruan se nuk do ta mbështesnin vendimin e drejtimit të partisë.
Për zgjedhjen e presidentit nevojitet një shumicë prej dy të tretash e deputetëve. Nëse Kuvendi nuk arrin të zgjedhë presidentin e ri brenda procedurave kushtetuese, Kosova mund të shkojë sërish në zgjedhje të parakohshme. Kjo do të ishte hera e katërt në vetëm dy vjet që vendi do të përballej me zgjedhje të tilla.
Sipas Reuters, paqëndrueshmëria politike ka vonuar reformat dhe ka ndikuar në qasjen e Kosovës në fondet e Bashkimit Evropian. Kosova, një nga vendet më të varfra të Evropës, synon anëtarësimin në BE, ndërsa Brukseli ka kërkuar vazhdimisht institucione të qëndrueshme dhe funksionale për zbatimin e reformave të nevojshme.
Ndërkohë, Partia Demokratike e Kosovës dhe Aleanca bojkotuan seancën e Kuvendit, duke paralajmëruar se do t’i drejtohen Gjykatës Kushtetuese për të shqyrtuar nëse gjatë konstituimit të Kuvendit janë shkelur procedurat ligjore. Edhe LDK-ja nuk mori pjesë në votimin për qeverinë e re.
Në këtë situatë, rikthimi i Kurtit në postin e kryeministrit nuk e ka zgjidhur plotësisht krizën institucionale në Kosovë, pasi beteja për zgjedhjen e presidentit mund të përcaktojë nëse vendi do të arrijë të shmangë një tjetër proces zgjedhor.
