Ministri i Brendshëm në detyrë i Kosovës, Xhelal Sveçla, është dënuar me një vit burgim me kusht nga Gjykata në Prishtinë, pasi u shpall fajtor për veprën penale të “përdorimit të armës apo mjetit të rrezikshëm”.
Çështja lidhet me ngjarjet e 21 marsit 2018 në Kuvendin e Kosovës, gjatë seancës ku po shqyrtohej ratifikimi i Marrëveshjes së Demarkacionit me Malin e Zi.
Sipas vendimit të gjykatës, dënimi me një vit burg nuk do të ekzekutohet nëse Sveçla nuk kryen një vepër tjetër penale gjatë periudhës së përcaktuar të kushtit.
“Dënim me burgim me kohëzgjatje 1 viti, nëse nuk kryen vepra penale brenda afatit të kushtëzuar. Pala mund të parashtrojë ankesë brenda 30 ditësh”, deklaroi gjyqtari Sabit Sadikaj.
Sveçla është detyruar gjithashtu të paguajë 50 euro shpenzime gjyqësore.
Prokuroria kishte kërkuar një dënim më të rëndë ndaj tij. Prokurori Valdrin Krasniqi i propozoi gjykatës që ministri në detyrë të dënohej me dy vite burgim efektiv dhe 3 mijë euro gjobë.
“Gjykatës i propozojmë që, me rastin e matjes së dënimit, të pandehurit Xhelal Sveçla t’i shqiptohet dënim me burgim efektiv me kohëzgjatje prej dy vitesh dhe dënim me gjobë në shumën prej 3 mijë eurosh”, deklaroi Krasniqi.
Kryetari i trupit gjykues, Sabit Sadikaj, e kishte shpallur Sveçlën fajtor më 2 shtator, ndërsa shqiptimin e dënimit e kishte lënë për një datë tjetër.
