Struktura e Posaçme Kundër Korrupsionit dhe Krimit të Organizuar (SPAK), në bashkëpunim me autoritetet finlandeze, ka finalizuar një operacion të rëndësishëm kundër grupeve kriminale shqiptare të përfshira në trafikun ndërkombëtar të drogës.
Në një konferencë për shtyp në Tiranë, kreu i SPAK-ut, Altin Dumani, dhe përfaqësues të lartë të prokurorisë së Finlandës njoftuan rezultatet e hetimit dyvjeçar, i cili shënon një moment të rëndësishëm në bashkëpunimin mes dy vendeve.
Sipas Dumanit, operacioni ka goditur disa grupe kriminale shqiptare që vepronin në vendet nordike, duke përfshirë Finlandën. Ai theksoi se hetimi ka rezultuar në krijimin e njësisë së parë të përbashkët hetimore mes SPAK-ut dhe autoriteteve finlandeze. “Rezultatet e këtij operacioni konfirmojnë përfshirjen e krimit të organizuar shqiptar në trafikun e lëndëve narkotike, duke përfshirë marijuanën dhe drogat sintetike,” deklaroi Dumani.
Nga ana tjetër, përfaqësuesi i Byrosë Kombëtare të Hetimit në Finlandë njoftoi se gjatë këtij hetimi janë arrestuar 55 persona dhe janë sekuestruar 300 kg drogë, përfshirë 170 kg amfetaminë, 10 kg kokainë dhe 100 kg marijuanë e kanabis. Ai theksoi se drejtuesit kryesorë të këtyre rrjeteve ishin shtetas shqiptarë.
Operacioni konsiderohet si një shembull i rëndësishëm i bashkëpunimit ndërkombëtar në luftën kundër krimit të organizuar.
Detaje të operacionit:
- Trafiku i drogës ndodhte nga Holanda dhe Spanja drejt Finlandës, i drejtuar nga një rrjet kriminal me shtetas shqiptarë.
- Gjatë hetimit janë sekuestruar:
- 170 kg amfetaminë
- 10 kg kokainë
- 100 kg kanabis
- Janë arrestuar 9 persona, ndërsa 2 të tjerë janë në kërkim.
- Në Shqipëri janë sekuestruar 8 automjete, telefona celularë dhe dokumente në gjuhën finlandeze, që provojnë aktivitetin kriminal.
Zanafilla e hetimit:
Prokurori Arben Kraja tha se hetimi nisi në Shqipëri në qershor 2023, pas informacionit të ardhur nga autoritetet finlandeze. Më pas u krijua një skuadër e përbashkët hetimore, që punoi për gati dy vite për të çmontuar rrjetin.
Prokurori i SPAK Alfred Shehu konfirmoi se janë lëshuar 11 masa sigurie nga GJKKO, ku 9 janë ekzekutuar deri tani. Ai shtoi se hetimi pasuror është në proces, dhe dokumentet e sekuestruara, shumë prej tyre në gjuhën finlandeze, kanë vlerë të lartë për zbardhjen e të gjithë zinxhirit të trafikut.
Dumani: “SPAK po fiton besimin ndërkombëtar”
“Kjo goditje është dëshmi se SPAK është një partner i besuar për strukturat europiane dhe nordike të drejtësisë. Po ndërtojmë një sistem të aftë të ndjekë krimin ndërkombëtar, jo vetëm brenda territorit shqiptar, por edhe përtej kufijve”, deklaroi Dumani.
