Një ngjarje tragjike ka ndodhur në plazhin e Durrësit, ku një turist anglez ka humbur jetën pasi ra në det gjatë përdorimit të një Jet Ski. Viktima është identifikuar si Silvester Dheug, 34 vjeç, ndërsa partnerja e tij, Vera Ruani, 31 vjeçe, ndodhet në spital në gjendje të rëndë shëndetësore.
Ngjarja ndodhi në afërsi të bregut, ku çifti, pjesë e një grupi turistësh nga Anglia, po shijonin pushimet në Shqipëri. Pas marrjes së mjeteve lundruese, ata dyshohet se kanë kryer manovra me shpejtësi në det, çka ka çuar në rrëzimin e tyre në ujë.
Pushuesit që ndodheshin në zonë e panë incidentin dhe lajmëruan menjëherë policinë dhe shërbimet e emergjencës. Fillimisht u dyshua se viktima kishte ndërruar jetë nga hipotermia, por kjo pistë është përjashtuar, pasi turistët kishin qëndruar vetëm pak minuta në ujë. Paraprakisht, mjekët dyshojnë për mbytje ose arrest kardiak si pasojë e lodhjes në përpjekje për të dalë nga deti.
Në lidhje me ngjarjen, Policia ka arrestuar shtetasin Luis Xhumari, i cili u identifikua si personi që ofronte për qira mjetet lundruese (Jet Ski) pa asnjë dokumentacion të rregullt ligjor për ushtrimin e aktivitetit. Po ashtu, ai nuk kishte pajisur përdoruesit me veshjet dhe pajisjet e nevojshme të sigurisë, duke shkelur rëndë rregullat për sigurinë në ujë.
