Prokuroria e Tiranës sekuestron pasuritë e pajustifikuara në Shqipëri të shtetasit A.Ll., i dënuar për çështje droge në Britaninë e Madhe
Në kuadër të hetimeve mbi procedimin pasuror nr. 04, datë 22.05.2025, rezultoi se shtetasi A.Ll. është dënuar në Angli për veprën penale “Prodhim dhe shitje të lëndëve narkotike”, ndërsa pasuritë e tij në Shqipëri nuk justifikohen nga pikëpamja ekonomike dhe dyshohet se lidhen e rrjedhin nga veprimtaria kriminale.
Shtetasi B.Ll. (babai i subjektit) rezulton pronar i një pasurie të paluajtshme, truall me sipërfaqe rreth 275.2 m² dhe një godinë 2-katëshe + bodrum + papafingo, e regjistruar më datë 24.03.2021. Ndërkohë, vëllai i subjektit zotëron një aktivitet privat me fushë veprimtarie në riparim automjetesh, tregti me pakicë të pjesëve të përdorura dhe të reja, si dhe import, shitje dhe blerje makinash.
Nga analiza e fakteve dhe dokumentacionit të administruar në lidhje me pasurinë e luajtshme të shtetasit A.Ll., rezulton se ai disponon një nivel ekonomik të pajustifikuar, duke ngritur dyshime të arsyeshme se kjo pasuri është përfituar nga veprimtaria kriminale në fushën e prodhimit dhe shitjes së narkotikëve.
Për këtë arsye, Prokuroria pranë Gjykatës së Shkallës së Parë të Juridiksionit të Përgjithshëm, Tiranë, ka kërkuar sekuestrimin e pasurive të mëposhtme që rezultojnë të regjistruara në emër të personave të lidhur me subjektin:
- Pasuria e paluajtshme me nr. 416/118, me sipërfaqe totale 403.1 m² “Truall” dhe 275.2 m² ndërtesë, ½ pjesë;
- Dy automjete të markave Opel Corsa dhe Jeep Grand Cherokee;
- Aktiviteti tregtar me emrin “Auto Lleshi”, NUIS L52116150G, me fushë veprimtarie në riparim automjetesh, tregti me pakicë të pjesëve të përdorura dhe të reja, import, shitje dhe blerje makinash.
