Vrasja e Pjetër Kazës dyshohet të ketë ndodhur për motive gjakmarrjeje.
Një histori tronditëse që daton që në 7 janar 1994, kur qyteti i Rrëshenit u trondit nga vrasja e Shefit të Krimeve, Ndue Kaza. Ai u qëllua me armë zjarri në mes të qytetit nga Dod Gjini. Sipas raportimeve të kohës, dyshohet se vrasja ndodhi pasi Kaza ndërhyri për të shmangur përshkallëzimin e një konflikti mes dy grupeve.
Tre vite pas kësaj ngjarjeje, më 3 korrik 1997 në Laç, vëllai i Ndue Kazës u hakmor duke vrarë dy vëllezërit Dod dhe Agustin Gjini.
Gjykata e Kurbinit shpalli fajtor në mungesë për vrasjen e dy vëllezërve Gjini, Martin Kazën, dhe e dënoi me 22 vite burg.
Martin Kaza u cilësua fajtor për akuzën e “Vrasjes me paramendim, e kryer në bashkëpunim”, si dhe “Armëmbajtje pa leje”.
Ai u arrestua në Londër dhe në vitin 2017 u ekstradua drejt Shqipërisë, ku edhe po vijon të vuajë dënimin.
Kur dukej se saga e gjakmarrjes kishte përfunduar, në Belgjikë në maj të vitit 2024, u plagos me 4 plumba e më pas ndërroi jetë Agustin Kaza, vëllai i Martin Kazës.
Pas mesnatës së të shtunës, në oborrin e banesës u qëllua për vdekje Pjetër Kaza, duke çuar në 5 numrin e viktimave të kësaj sage të gjatë përplasjeje mes fiseve Gjini e Kaza.
