Një tjetër fazë e operacionit ndërkombëtar të koduar “The Wanted” është finalizuar nga Policia e Shtetit, falë bashkëpunimit të ngushtë mes njësisë FAST Albania, Drejtorisë Vendore të Policisë Gjirokastër dhe njësisë homologe të FAST në Kosovë, nën koordinimin e rrjetit europian të bashkëpunimit policor ENFAST.
Në kuadër të këtij operacioni, u bë e mundur kapja në qytetin e Tepelenës e një shtetasi shqiptar të shpallur në kërkim ndërkombëtar për llogari të drejtësisë kosovare. Bëhet fjalë për 37-vjeçarin A. K., lindur në Tepelenë, i cili ishte shpallur në kërkim nga autoritetet e Kosovës për veprat penale të kultivimit të bimëve narkotike dhe armëmbajtjes pa leje.
Gjykata Themelore e Pejës kishte lëshuar gjatë vitit 2024 dy urdhër-arreste ndërkombëtare ndaj këtij shtetasi. Veprimtaria e tij kriminale e dyshuar ka përfshirë raste të përsëritura të kultivimit të bimëve narkotike, si dhe posedimin e armëve pa autorizim.
Kapja e 37-vjeçarit u realizua si rezultat i koordinimit efikas të informacioneve operative dhe veprimeve policore, ndërmjet njësive të specializuara FAST në Shqipëri dhe në Kosovë, me mbështetjen e rrjetit ENFAST – një strukturë e ngritur për të rritur efikasitetin në kapjen e personave të kërkuar në gjithë hapësirën evropiane.
Interpol Tirana është vënë në kontakt të drejtpërdrejtë me agjencitë ligjzbatuese në Kosovë, për të përshpejtuar dhe finalizuar procedurat ligjore që do të çojnë në ekstradimin e A. K. drejt Kosovës, ku do të përballet me drejtësinë për akuzat që rëndojnë mbi të.
Policia e Shtetit vlerëson bashkëpunimin e frytshëm me partnerët ndërkombëtarë dhe konfirmon se operacionet për kapjen e personave në kërkim do të vijojnë pa ndërprerje, si pjesë e angazhimit për forcimin e sundimit të ligjit dhe luftën kundër krimit të organizuar.
