Gjykata e Tiranës ka caktuar masën e sigurimit “arrest në burg” për tetë persona të arrestuar në kuadër të një operacioni kundër shitblerjes së armëve. Të dyshuarit që do të qëndrojnë në qeli janë: Emirel Tusha, Leandro Haxhiaj, Fabricio Berberi, Rikardo Hajdaraj, Visar Murati, Kevin Farruku, Geraldo Muraj dhe Adriano Shehu.
Asnjë nga të ndaluarit nuk ka folur gjatë seancës gjyqësore, ndërsa avokatët e tyre kanë kundërshtuar mënyrën e veprimit të policisë, duke pretenduar se janë përdorur metoda të paligjshme gjatë blerjeve të stimuluara, të cilat sipas tyre kanë nxitur individët të kryejnë veprime të kundërligjshme.
Mbrojtja ka kërkuar që për secilin prej të arrestuarve të paraqiten prova të qarta për veprimet konkrete që dyshohet se kanë kryer, si dhe akt-ekspertiza të armëve të sekuestruara, për të vërtetuar nëse ishin ose jo funksionale. Po ashtu, është kërkuar që gjykata të marrë në konsideratë faktin se të arrestuarit nuk kanë precedentë penalë të mëparshëm, duke e konsideruar të paligjshëm arrestimin e tyre.
Nga ana tjetër, Prokuroria ka vënë në dispozicion të gjykatës akt-ekspertimet për armët e sekuestruara gjatë arrestimit të Altin Pajazitit dhe Kadri Prushit, ku rezulton se një nga armët ishte jashtë funksionit.
Operacioni i forcave të rendit ka çuar në sekuestrimin e 14 armëve të zjarrit, përfshirë 12 pistoleta (një prej tyre me silenciator) dhe 2 automatikë, si dhe municion luftarak, 2077 fara cannabisi, tre automjete dhe tetë celularë.
