Një 15-vjeçar mbeti i plagosur me armë zjarri mbrëmjen e djeshme në një piceri në zonën e “Ali Demit”, në Tiranë. Ngjarja e rëndë ndodhi në ambientet e picerisë “Fantazia”, pas një konflikti që dyshohet se ka nisur për motive të dobëta.
Policia ka shpallur në kërkim autorin e dyshuar të plagosjes, shtetasin Aldi Neziri, 21 vjeç, i cili dyshohet se ka qëlluar me një armë zjarri atipike drejt të miturit. Bashkë me të, është shpallur në kërkim edhe Leonardo Mejdani, 24 vjeç, administratori i lokalit, i akuzuar për moskallëzim krimi dhe pengim të drejtësisë.
Në kuadër të hetimeve, janë arrestuar edhe tre punonjës të picerisë, përkatësisht:
- Ferit Basha, 20 vjeç
- Andi Hyka, 29 vjeç
- Keivin Bala, 20 vjeç
Ata akuzohen se pas ngjarjes kanë pastruar vendin dhe kanë hequr DVR-në e kamerave të sigurisë, me qëllim fshehjen e provave dhe pengimin e hetimeve.
Gjithashtu, është referuar materiali në Prokurori edhe për një shtetase 15-vjeçare, për veprën penale “Veprime që pengojnë zbulimin e të vërtetës”.
