Drejtori i CIA-s, John Ratcliffe, ka zhvilluar të martën një vizitë të paparalajmëruar në Moskë, në një moment tensionesh të larta mes Shteteve të Bashkuara dhe Rusisë dhe ndërsa lufta në Ukrainë vazhdon.
Vizita është konfirmuar nga disa media të mëdha amerikane, të cilat citojnë burime të besuara për çështjen. Reuters raporton se Ratcliffe ndodhej në Moskë për takime, por qëllimi i saktë i udhëtimit dhe identiteti i zyrtarëve rusë me të cilët është takuar nuk janë bërë publikë. CIA dhe Kremlini nuk kanë pranuar të komentojnë mbi përmbajtjen e vizitës.
Vëmendje të veçantë tërhoqi mbërritja në aeroportin Vnukovo të Moskës e një avioni transportues ushtarak amerikan C-17 Globemaster III. Sipas Reuters, avioni me numër identifikimi 07-7181 mbërriti në Moskë pasi ishte nisur nga Riga e Letonisë. Ai kishte mbërritur në Riga më 23 gusht nga një bazë pranë Uashington.
Mediat amerikane raportuan se udhëtimi i Ratcliffe drejt kryeqytetit rus ishte kryer me avionin ushtarak amerikan. The Wall Street Journal shkruan se qëndrimi i kreut të CIA-s në Moskë zgjati rreth katër orë.
Vizita përbën udhëtimin e parë të njohur publikisht të Ratcliffe në Moskë që kur mori drejtimin e CIA-s. Reuters e cilëson gjithashtu si vizitën e parë të raportuar të një drejtuesi të inteligjencës amerikane në kryeqytetin rus që nga udhëtimi i ish-drejtorit të CIA-s William Burns në vitin 2021.
Sipas The Guardian, vizita zhvillohet ndërsa përpjekjet diplomatike për luftën në Ukrainë vazhdojnë të përballen me vështirësi. CIA ka luajtur edhe më parë rol në komunikimet e drejtpërdrejta mes Uashingtonit dhe Moskës, përfshirë çështjet që lidhen me shkëmbimin e të burgosurve.
Megjithatë, deri tani nuk ka asnjë konfirmim zyrtar se bisedimet e Ratcliffe kanë pasur në fokus një marrëveshje paqeje për Ukrainën, situatën në Iran apo zhvillime të tjera të sigurisë ndërkombëtare.
Për këtë arsye, raportimet se drejtori i CIA-s mund t’i ketë dërguar Moskës një propozim konkret për Ukrainën apo një paralajmërim të posaçëm nuk janë konfirmuar dhe mbeten në nivelin e spekulimeve.
Vizita e paparalajmëruar e kreut të CIA-s në Moskë, megjithatë, sinjalizon se kanalet e komunikimit të nivelit të lartë mes Uashingtonit dhe Moskës vazhdojnë të funksionojnë, pavarësisht tensioneve të forta mes dy vendeve.
