Administrata e presidentit amerikan Donald Trump ka ndaluar importin në Shtetet e Bashkuara të robotëve të rinj humanoidë dhe robotëve me katër këmbë të prodhuar jashtë vendit, duke argumentuar se këto pajisje përbëjnë një rrezik për sigurinë kombëtare.
Vendimi, i shpallur nga Komisioni Federal i Komunikimeve (FCC), përfshin gjithashtu ndalimin e importit të invertorëve të energjisë që përdoren në qendrat e të dhënave dhe sistemet e energjisë diellore. Të gjitha këto produkte janë shtuar në Listën e Mbuluar të FCC-së, ku përfshihen pajisjet që konsiderohen kërcënim për infrastrukturën kritike të SHBA-së.
Kryetari i FCC-së, Brendan Carr, tha se masa synon të mbrojë zinxhirët kritikë të furnizimit, duke paralajmëruar se robotët e prodhuar jashtë SHBA-së mund të përdoren për mbikëqyrje, spiunazh ose të kontrollohen nga distanca nga aktorë keqdashës. Sipas agjencisë, edhe invertorët e energjisë mund të shfrytëzohen për sulme kibernetike, ndërprerje të sistemeve ose vjedhje të të dhënave.
Ndalimi zbatohet vetëm për modelet e reja të këtyre pajisjeve dhe nuk prek robotët apo invertorët që kanë marrë më herët autorizim nga FCC për t’u importuar ose tregtuar në SHBA.
Shumica e robotëve humanoidë dhe me katër këmbë prodhohen në Kinë, e cila po konkurron me SHBA-në në zhvillimin e robotikës dhe inteligjencës artificiale. Për këtë arsye, vendimi shihet si pjesë e strategjisë së Uashingtonit për të mbrojtur epërsinë teknologjike dhe për të reduktuar varësinë nga teknologjitë e huaja.
Ambasada kineze në Uashington reagoi menjëherë, duke e cilësuar masën si një politizim të çështjeve tregtare dhe të sigurisë. Pekini akuzoi SHBA-në për përdorimin e “preteksteve të pabaza” kundër kompanive kineze dhe paralajmëroi se do të ndërmarrë të gjitha masat e nevojshme për të mbrojtur interesat e saj, ndërsa i bëri thirrje Uashingtonit të heqë dorë nga “mentaliteti hegjemonik” dhe të mbështesë bashkëpunimin ndërkombëtar në fushën e inteligjencës artificiale.
