Presidenti amerikan Donald Trump ka njoftuar se ka vendosur të anulojë sulmet e planifikuara ndaj Iranit, me kusht që të arrihet sa më shpejt një marrëveshje me Teheranin.
Deklarata e tij vjen vetëm disa orë pasi mediat amerikane raportuan se Uashingtoni po shqyrtonte mundësinë e ndërmarrjes së sulmeve të reja ajrore ndaj objektivave iraniane.
Në një postim në platformën Truth Social, Trump tha se kishte pranuar të ndalonte operacionin ushtarak “për të mirën e ardhshme të botës” dhe për mbijetesën e një Irani “të suksesshëm dhe të begatë”, nëse palët arrijnë një marrëveshje në një kohë të shkurtër.
Megjithatë, presidenti amerikan theksoi se Shtetet e Bashkuara mbeten plotësisht të përgatitura për të ndërmarrë veprime ushtarake kundër Republikës Islamike të Iranit, duke deklaruar se kapaciteti ushtarak amerikan është në nivele të papara që nga Lufta e Dytë Botërore.
Trump bëri të ditur se vendimi për të pezulluar sulmin erdhi pasi, sipas tij, Irani dhe disa vende të Lindjes së Mesme kërkuan shtyrjen e operacionit, duke argumentuar se ishin përcaktuar parametrat bazë të një marrëveshjeje.
Sipas presidentit amerikan, marrëveshja do të përfshinte hapjen e menjëhershme, të plotë dhe të pakushtëzuar të Ngushticës së Hormuzit, si dhe eliminimin e kërcënimit bërthamor të Iranit.
Në fund të mesazhit të tij, Trump tha se edhe Izraeli e mbështet këtë angazhim dhe u bëri thirrje të gjitha palëve të përfshira të intensifikojnë përpjekjet për finalizimin e marrëveshjes, duke shmangur një përshkallëzim të mëtejshëm të konfliktit.
