Thirrja e Toni Gogut për bashkimin opozitar në Komisionin Antikorrupsion/ Rritet shqetësimi për hetimin e Veliajt nga SPAK
Deputeti socialist Toni Gogu i ka bërë thirrje deputetëve të opozitës që t'i bashkohen Komisionit të Posaçëm Antikorrupsion, i cili drejtohet nga socialisti Fatmir Xhafaj.
Si një deputet i afërt me Erion Veliajn, ai shfrytëzoi ceremoninë për 82-vjetorin e Konferencës së Pezës, duke e vlerësuar këtë ngjarje historike si një moment bashkimi mes shqiptarëve. Gogu gjithashtu bëri thirrje për një tjetër bashkim të madh, këtë herë në luftën kundër korrupsionit.
Toni Gogu nuk e fshehu shqetësimin për hetimin që SPAK po kryen ndaj Erion Veliajt, duke pranuar publikisht: "Lufta kundër korrupsionit nuk mund t’u lihet disa të përzgjedhurve. Ajo kërkon pjesëmarrjen aktive të çdo shqiptari, çdo institucioni dhe çdo force politike." Se ç’të përzgjedhur i duhen Toni Gogut për të luftuar korrupsionin kjo mbetet ende për t’u parë.
Me këtë kërkesë për bashkëpunim, deputeti Gogu synon të plotësojë një nga kushtet thelbësore që Komisioni Xhafaj të funksionojë: pjesëmarrjen e të gjithë spektrit politik.
"Sot kemi nevojë për të njëjtën frymë si ajo e Konferencës së Pezës. Na duhet që opozita të jetë me ne, jo vetëm kur është e përshtatshme, por gjithmonë, për hir të Shqipërisë," tha Gogu. Ai, megjithatë, ndoshta nuk e ka të qartë historinë e vërtetë pas Konferencës së Pezës, e cila solli më shumë vëllavrasje sesa bashkim. Duke ngatërruar simbolikën e kurthit që komunistët ngritën me Konferencën e Pezës për faktorët e tjerë antifashistë, me kurthin e radhës që postkomunistët në PS po përgatisin për të përfshirë opozitën në komision, që me gjasë do të zgjatë “kthetrat” e pushtetit mbi SPAK.
