Një ilaç i përdorur prej dekadash kundër dhimbjeve mund të ketë një rol shumë më të rëndësishëm sesa mendohej. Studime të reja tregojnë se aspirina mund të zvogëlojë ndjeshëm rrezikun e zhvillimit dhe përhapjes së disa llojeve të kancerit, veçanërisht atij të zorrës së trashë, duke bërë që disa vende të ndryshojnë edhe udhëzimet mjekësore.
Një nga provat më të rëndësishme klinike u zhvillua te pacientët me Sindromën Lynch, një çrregullim gjenetik që rrit ndjeshëm rrezikun për kancer të zorrës së trashë. Pas ndjekjes për 10 vite të 861 pacientëve, studiuesit zbuluan se ata që morën aspirinë çdo ditë për të paktën dy vite kishin rreth 50% më pak raste të kancerit të zorrës së trashë krahasuar me grupin që nuk e përdori.
Rezultatet e një studimi të dytë sugjerojnë se edhe dozat e ulëta, 75–100 mg në ditë, mund të jenë po aq efektive, ndërsa shkaktojnë më pak efekte anësore.
Një tjetër studim i zhvilluar në Suedi me afro 3 mijë pacientë që kishin kaluar ndërhyrje kirurgjikale për kancer kolorektal tregoi se aspirina uli me më shumë se gjysmën rrezikun e rikthimit të sëmundjes te pacientët me mutacione të caktuara gjenetike. Pas këtyre rezultateve, Suedia ka nisur që nga viti 2026 testimin e pacientëve për këto mutacione dhe u rekomandon aspirinë në doza të ulëta atyre që përfitojnë prej saj.
Shkencëtarët besojnë se aspirina pengon mekanizmat që ndihmojnë qelizat tumorale të përhapen në organizëm. Ajo gjithashtu mund ta bëjë më të lehtë për sistemin imunitar të identifikojë dhe të luftojë qelizat kancerogjene.
Megjithatë, ekspertët theksojnë se aspirina nuk duhet të merret si masë parandaluese nga të gjithë. Ilaçi mund të shkaktojë efekte serioze anësore, si gjakderdhje në stomak, ulçera apo hemorragji, ndaj përdorimi i saj duhet të bëhet vetëm me rekomandimin dhe mbikëqyrjen e mjekut.
Aktualisht po zhvillohen studime të tjera për të parë nëse aspirina mund të ketë efekt mbrojtës edhe ndaj llojeve të tjera të kancerit, si ai i gjirit, prostatës dhe ezofagut. Rezultatet priten të publikohen gjatë vitit të ardhshëm.
