Një valë e fortë të nxehti nuk ndikon vetëm në trup, por edhe në funksionimin e trurit. Një studim i publikuar në revistën shkencore PLOS Climate tregon se temperaturat e larta ulin përqendrimin, kujtesën dhe shpejtësinë e vendimmarrjes, duke e detyruar trurin të kalojë në një lloj “kursimi energjie”.
Sipas studiuesve, kur organizmi përpiqet të ulë temperaturën e trupit, një pjesë e madhe e energjisë shpenzohet për termorregullimin, si djersitja dhe rritja e qarkullimit të gjakut në lëkurë. Si pasojë, mbeten më pak burime për proceset komplekse njohëse, duke e bërë njeriun më të ngadaltë në të menduar dhe më të prirur ndaj gabimeve.
Ekspertja e neuroshkencës mjedisore në Washington State University, Kimberly Meidenbauer, shpjegon se truri sillet në mënyrë të ngjashme me procesorin e një kompjuteri, i cili ul performancën kur mbinxehet për të shmangur dëmtimin.
Një eksperiment i zhvilluar nga Harvard T.H. Chan School of Public Health tregoi se studentët që flinin në godina pa ajër të kondicionuar gjatë një vale të nxehti zgjidhnin testet njohëse më ngadalë dhe bënin më shumë gabime sesa ata që pushonin në ambiente të freskëta.
Studiuesit theksojnë se dehidratimi dhe mungesa e gjumit e përkeqësojnë situatën. Sipas analizave, netët me vapë mund të ulin kohëzgjatjen e gjumit deri në një orë, ndërsa rritet edhe niveli i kortizolit, hormonit të stresit, duke ndikuar negativisht në funksionimin e trurit.
Efektet nuk kufizohen vetëm te kujtesa dhe përqendrimi. Sipas ekspertëve të American Psychological Association, temperaturat e larta lidhen me rritje të nervozizmit, ankthit, agresivitetit dhe ndjeshmërisë emocionale. Një studim i King’s College London zbuloi se gjatë valëve të fundit të të nxehtit në Britani, përdorimi i shërbimeve të shëndetit mendor u rrit me rreth 7%, ndërsa shtrimet për episode psikotike u shtuan me 66%, veçanërisht te personat më të rrezikuar.
Shkencëtarët paralajmërojnë se, me shtimin e valëve të të nxehtit si pasojë e ndryshimeve klimatike, mbrojtja e shëndetit të trurit do të bëhet një sfidë gjithnjë e më e rëndësishme për sistemet shëndetësore dhe planifikimin urban në vitet e ardhshme.
