Procedurat estetike si botoksi dhe filler-at po përdoren gjithnjë e më shumë, por ekspertët paralajmërojnë se kur bëhen për të fituar pranimin e të tjerëve, mund të shoqërohen me pasoja psikologjike. Sipas një studimi të kryer nga psikiatrja turke Sevler Yildiz, personat që i drejtohen më shpesh ndërhyrjeve estetike kanë më shumë gjasa të shfaqin varësi nga rrjetet sociale, ankth, depresion dhe çrregullim të perceptimit të trupit.
Sipas specialistëve, rrjetet sociale ushqejnë presionin për t’iu përshtatur standardeve të bukurisë dhe krijojnë pritshmëri jorealiste. Ndërhyrjet estetike mund të përmirësojnë pamjen, por nuk zgjidhin automatikisht mungesën e vetëvlerësimit apo vështirësitë në marrëdhëniet shoqërore. Madje, efekti pozitiv psikologjik mund të jetë i përkohshëm, duke shtyrë disa persona të kërkojnë ndërhyrje të përsëritura.
Ekspertët theksojnë se procedurat estetike kanë kuptim vetëm kur bëhen për t’u ndier më mirë me veten dhe jo për të fituar miratimin e të tjerëve. Për të përballuar ankthin social dhe pasiguritë personale, puna me mirëqenien psikologjike mbetet po aq e rëndësishme sa çdo trajtim estetik.
