Prokurori i Përgjithshëm, Olsian Çela, prezantoi këtë të martë raportin vjetor mbi punën e Prokurorisë për vitin 2024, përpara Këshillit të Lartë të Prokurorisë. Sipas tij, numri i çështjeve të trajtuara nga prokuroritë e juridiksionit të përgjithshëm ka pësuar rritje në të gjithë treguesit kryesorë.
Në total, gjatë vitit 2024 janë trajtuar 61,091 materiale kallëzuese, që përbën një rritje prej 10.5% krahasuar me vitin 2023.
“Janë ndjekur 47,501 procedime penale, me një rritje prej 4.8% krahasuar me një vit më parë. Nga këto, 24,921 janë procedime të reja të regjistruara, me një rritje prej 3.4%, ndërsa 179 janë procedime të rifilluara, që tregojnë një ulje prej 10.9% në krahasim me 2023-n”, deklaroi Çela.
Gjithashtu, janë mbartur 22,401 procedime penale, një tjetër tregues në rritje prej 6.6% krahasuar me vitin e kaluar. Çela theksoi gjithashtu se është vendosur mosfillimi për 13,590 kallëzime dhe referime penale, duke shënuar një rritje të ndjeshme prej 36.6%.
Sipas Prokurorit të Përgjithshëm, këto shifra përfshijnë jo vetëm procedimet e reja dhe ato të mbartura, por edhe ato të rifilluara dhe vendimet e mosfillimit të marra gjatë vitit, me përjashtim të çështjeve që kanë lidhje me Kodin Penal Ushtarak.
