Kryeministri Edi Rama vijon propagandën mediatike për t’i dhënë zemër Policisë së Shtetit, e cila është vendosur në vijën e parë të përplasjeve me studentët dhe gjimnazistët protestues. Pas premtimit të mëngjesit për një shpërblim prej 2500 eurosh, kreu i qeverisë ka shpërndarë një tjetër video me muzik dhe mesazh inkurajues për efektivët, këtë herë duke i shpallur mbrojtës të ëndrrës europiane të Shqipërisë.
“RESPEKT dhe po, jeni më të mirët në këto ditë agresioni me gurë e me zjarr mbi ëndrrën e Shqipërisë 2030 në Bashkimin Europian. “Durim dhe vetëpërmbajtje me të rinjtë që protestojnë. Forcë me gurëhedhësit dhe zjarrvënësit e maskuar”, shkruan Rama.
Por mbetet për t'u parë se sa mund të ndikojnë këto lavdërime te efektivët që duhet të përballojnë gurët, tensionet dhe zemërimin e qytetarëve, ndërsa në anën tjetër të kordonit policor qëndron një qeveri e përballur me akuza të vazhdueshme për korrupsion.
Edhe premtimi për 2500 euro shpërblim ngre pikëpyetje serioze për besueshmërinë e tij. Vështirë të ngjallë entuziazëm një shumë e tillë, kur qeveria është kritikuar për mosshlyerjen e pagesave që u takojnë punonjësve të policisë për orët shtesë të punës.
Megjithatë, lëvdatat dhe motivimi i kryeministrit tregon se përveçse nuk ka ndërmend të dëgjoj të rinjtë, por po e nxit akoma më shumë dhunën mes policisë dhe protetsuesve.
