Kryeministri Edi Rama ishte sot i pranishëm në ceremoninë e dorëzimit të certifikatave për rezidentët e parë të Durana Tech Park, hapësirë që synon të bëhet epiqendra e zhvillimit teknologjik dhe ekonomik në rajon.
Në fjalën e tij, Rama theksoi se objektivi kryesor i kësaj iniciative është krijimi i mbi 5 mijë vendeve të reja të punës për ekspertët e teknologjisë, me paga shumë të larta.
“Synojmë të rrisim eksportet dhe të ardhurat me 3.5 miliardë euro brenda dy dekadave vetëm nga kjo iniciativë,” deklaroi ai, duke shtuar se ndikimi i parkut teknologjik pritet të sjellë mbi gjysmë miliardë euro të ardhura në buxhetin e shtetit.
Rama njoftoi gjithashtu se Diella, asistentja dixhitale e e-Albania, do të kalojë në një fazë të re reformimi, ku do të automatizojë të gjitha shërbimet publike për qytetarët.
“Brenda disa javësh, shërbimet dixhitale do të kalojnë në një nivel tjetër, ku asistenca me zë do të bëjë punën që sot e bën një nëpunës,” sqaroi kryeministri.
Shqipëria si qendër e inovacionit për BE
Gjatë fjalës së tij, Rama theksoi se Durana Tech Park ka ngjallur interes jo vetëm nga kompani të mëdha ndërkombëtare, por edhe nga universitete prestigjioze europiane.
“Tre universitete të njohura italiane kanë shprehur interes për t’u bërë pjesë e këtij parku, dhe po përgatisim një kornizë rregullatore për të lehtësuar integrimin e tyre,” tha ai.
Kryeministri përmendi edhe bashkëpunimin me Francën, duke theksuar se Durana Tech Park do të shërbejë si një hapësirë për kompanitë e BE-së, në një kohë kur unioni po rishikon rregulloret për sektorin e teknologjisë.
Në përfundim, Rama ftoi të rinjtë shqiptarë që të shohin Durana Tech Park si një mundësi për zhvillimin e tyre profesional në vend.
“Kjo është një mundësi e jashtëzakonshme për të gjithë ata që duan të ndërtojnë të ardhmen e tyre në teknologji, pa qenë të detyruar të largohen nga Shqipëria,” përfundoi ai.
