Kreu i Partisë Demokratike, Sali Berisha, mori pjesë sot në ceremoninë përkujtimore të katër martirëve të vrarë më 2 Prill 1991 në Shkodër. Gjatë fjalës së tij, ai e krahasoi situatën aktuale politike me periudhën e diktaturës, duke e cilësuar qeverisjen e sotme si një “regjim të bazuar në krim dhe terror”.
Berisha e akuzoi kryeministrin Edi Rama se drejton një “bandë kriminale” dhe bëri thirrje për një ndryshim të madh më 11 maj.
“Kjo bandë ka një kryebandit në krye që quhet Edi Rama. Sakrifica e martirëve të Shkodrës është më frymëzuese se kurrë. Më 11 maj duhet të kthejmë dritën e lirisë në Shkodër dhe në mbarë Shqipërinë,” deklaroi ai.
Berisha u bëri thirrje qytetarëve që të angazhohen për të garantuar votën e lirë në zgjedhjet e 11 majit, duke e cilësuar këtë datë si një mundësi për të ndëshkuar korrupsionin dhe krimin.
“Më 11 maj ne do të firmosim projektin e ëndrrës shqiptare, që ndëshkon me forcën e ligjit krimin dhe korrupsionin, dhe që e kthen Shqipërinë në një epiqendër zhvillimi dhe shprese,” u shpreh ai.
