Qeveria ka dhënë dakordësinë për krijimin dhe funksionimin e Parkut Teknologjik “Durana” në Durrës, një projekt që synon të nxisë investimet vendase dhe të huaja përmes një regjimi fiskal dhe doganor të lehtësuar.
Lajmin e bëri të ditur vetë Kryeministri Edi Rama disa minuta para se Këshilli i Ministrave të miratonte vendimin, duke e cilësuar këtë si një hap të rëndësishëm për zhvillimin ekonomik të vendit.
Sipas planit të detajuar, investimi për infrastrukturën lidhëse të parkut do të kushtojë 199 milionë lekë, që përbën rreth 9% të totalit të investimit. Projekti pritet të krijojë një mjedis të favorshëm për bizneset inovative dhe sektorin e teknologjisë, duke e kthyer Durrësin në një qendër të re ekonomike dhe industriale.
