Javët e fundit, deputetët të të dy krahëve, kryesisht në Komisionin e Ligjeve janë të shqetësuar për sekuestrimet dhe konfiskimet që po bën kryesisht SPAK dhe GJKKO.
Ata po e përdorin mikrofonin e Kuvendit për të ngritur zërin, për viktima të pafajshme, e megjithëkëtë, reagimi në sinkron, ngre pikëpyetje nëse është interesi i qytetarëve të zakonshëm ai që i udhëheq, apo lobime interesi me fuqi të lartë ekonomike bëjnë që kjo çështje të bërtitet.
Sot, në Komisionin e Ligjeve ishte deputeti i opozitës, Arjan Ndoja ai që ngriti shqetësimin për personat e tretë në mirëbesim, të cilët shpesh gjenden para faktit të konfiskimit pa u thirrur fare në gjykim.
"Në procedimet e tjera pasurore, personat e tretë nuk përfshihen fare dhe një ditë të bukur gjenden të ekspozuar para faktit që ndaj tyre është marrë masë konfiskimi të pasurisë, qoftë procesin penal, qoftë në procesin tjetër. E para nuk i thërrasim palët. Personat të tretë nuk thirren fare në gjykim. Një ditë të bukur gjenden të ekspozuar para faktit që nuk e kanë më titullin e pronësisë, e kanë të fshirë. Për personat e tretë e vetmja dispozitë penale, këtë e kam diskutuar me shumë aktorë të zbatimit të ligjit në praktikë, për personat e tretë nuk ka një zgjidhje juridike. Mos vallë duhet të bëjmë një rekomandim lidhje me një ndryshim ligjor për këtë lloj situate."
Javën e shkuar, edhe socialisti Damian Gjiknuri ngriti të njëjtin shqetësim në sy të kreut të SPAK, Klodian Braho.
“Çfarë pasojash kanë personat që kanë porositur apo furnizuar në asete që rezultojnë pasuri e krimit? Ky është një fenomen që duhet konsideruar nga ana e politikës penale. Po hyni me vlera të mëdha, 160 milionë vetëm një rast. Ta kalojmë lumin me këmbët tek gurët. A dimë ku po shkojmë? Tek palët e treta. Impakti në ekonomi mund të jetë i jashtëzakonshëm”,-tha Gjiknuri.
Klodian Braho u përgjigj se pasuritë e krimit janë tumor në ekonomi, dhe nuk ka zgjidhje tjetër veç sekuestrimit dhe konfiskimit dhe se SPAK është i vendosur të mos të mos tolerojë.
