Kryetari i Partisë Demokratike, Sali Berisha, deklaroi se PD nuk ka ndërhyrë dhe nuk synon të ndërhyjë në organizimin e protestës qytetare, por theksoi se e mbështet atë “me të gjitha mundësitë” bazuar në kërkesat e saj.
Gjatë një deklarate për mediat para godinës së SPAK, Berisha hodhi poshtë pretendimet se opozita ka “kapur” protestën.
“Absolutisht kurrë. Asnjë ndërhyrje në punët e saj. Nuk është protesta jonë dhe morali duhet të jetë i pamëshirshëm ndaj kujtdo që përpiqet ta kapë apo ta manipulojë atë protestë të të rinjve shqiptarë”, u shpreh ai.
Berisha tha se Partia Demokratike mbështet pesë kërkesat e protestuesve, duke theksuar se kjo mbështetje jepet pa simbole partiake dhe vetëm në frymën qytetare. Sipas tij, PD ka punuar edhe në arenën ndërkombëtare për të siguruar mbështetje për protestën.
I pyetur për sloganet që kërkojnë edhe largimin e tij nga politika, Berisha i cilësoi ato si “klithma” të asaj që e quajti “opozita e opozitës”, të cilën e akuzoi se vepron në interes të qeverisë.
“Janë përpjekje të opozitës së opozitës, vegël e mirëfilltë e qeverisë. Kjo nuk e ka penguar dhe nuk do ta pengojë Partinë Demokratike që ta mbështesë fuqimisht protestën dhe demokratët të jenë të pranishëm në të”, deklaroi Berisha.
