Pas 34 ditësh protesta, duket se lëvizja po hedh hapin e parë drejt një organizimi të brendshëm.
Përmes një postimi në Facebook, Klajdi Bello bëri të ditur se Grupi Nismëtar për organizimin e Kuvendit Kombëtar të Protestës ka zhvilluar një mbledhje pesëorëshe, në përfundim të së cilës janë miratuar në mënyrë unanime platforma dhe kriteret e anëtarësimit.
Sipas Bellos, procesi ka kërkuar 34 ditë për shkak të vështirësive dhe, siç shprehet ai, “shkopinjve nën rrota”, ndërsa emrat e kontribuesve nuk janë bërë publikë për t’i mbrojtur nga “raprezaljet”.
Ai thekson se Kuvendi Kombëtar i Protestës “me hir a me pahir do të mblidhet”, duke shtuar se protestuesit kanë nevojë për përfaqësim dhe se grupi nismëtar synon ta sigurojë atë. Në fund të reagimit, Bello përsërit se kërkesa për dorëheqjen e kryeministrit Edi Rama mbetet e panegociueshme.
Statusi i plotë i Klajdi Bellos:
Vëllezër e motra, dëshirojmë t’ju informojmë se pas një takimi i cili zgjati 5 orë të plota, Grupi Nismëtar për organizimin e Kuvendit Kombëtar të Protestës, miratoi në unanimitet platfomën dhe kriteret e anëtarësimit.
Na u nevojiten 34 ditë për të arritur në këtë pikë, ku kemi pasur pafund shkopinj nën rrota, por Zoti është më i madh dhe është me ne!
Mirënjohje pafund për kontribuesit (emrat nuk i themi sot për t’i mbrojtur nga raprezaljet, por të mirën s’ua harrojmë).
Kuvendi, me hir a me pahir do të mblidhet!
Protestuesit kanë nevojë për përfaqësim dhe ne jemi aty për këtë. Kjo gjë nuk diskutohet!
Siç është e padiskutueshme kërkesa dhe vullneti i Sovranit për dorëheqjen e Edi Ramës!
