Situata në Theth është tensionuar sot, teksa banorët janë përplasur me forcat e policisë në shenjë kundërshtimi ndaj aksionit për prishjen e ndërtimeve të konsideruara pa leje nga autoritetet.
Banorët kanë bllokuar urën hyrëse të fshatit, duke paralizuar qarkullimin dhe duke paralajmëruar se do të qëndrojnë aty “deri në tërheqjen e makinave të Inspektoratit”. Ata akuzojnë autoritetet për veprime të njëanshme dhe të papritura, ndërsa theksojnë se shumë nga ndërtesat janë ngritur me mjete vetjake për të përballuar fluksin e turistëve që mbërrijnë çdo verë në zonë.
“Ne nuk jemi kundër ligjit, por kërkojmë trajtim të drejtë. Po na shembin jetesën me fadroma,” tha një prej banorëve, duke kërkuar pezullimin e operacionit dhe nisjen e një dialogu me komunitetin lokal.
Në vendngjarje janë të pranishme forca të shumta policie, të cilat janë përballur me rezistencën e banorëve mes thirrjeve: “Thethi nuk shitet!” dhe “Jo prishjeve pa drejtësi!”. Banorët kanë vijuar bllokimin e rrugës pavarësisht paralajmërimeve të policisë për penalizime, ndërsa tensionet mbeten të larta.
Operacioni për lirimin e hapësirave publike ka prekur edhe disa prona të banorëve të Thethit, të cilët këmbëngulin se veprimet e ndërmarra në mes të sezonit turistik po dëmtojnë jetesën e tyre dhe imazhin e zonës si një destinacion i rëndësishëm turistik.
