Një ngjarje e rëndë dhe e paprecedentë është shënuar mbrëmjen e djeshme në Aeroportin e Beogradit, ku dhjetëra shtetas shqiptarë janë mbajtur për më shumë se një orë e gjysmë të mbyllur brenda një autobusi pa kondicioner dhe pa drita nga autoritetet serbe, duke përjetuar momente paniku dhe torturë psikologjike.
Ngjarja është denoncuar mëngjesin e sotëm nga gazetari Blendi Fevziu, i cili publikoi dëshminë e një qytetari shqiptar të identifikuar si Orlando, që kishte zgjedhur të udhëtonte me linjën “Air Serbia” nga Beogradi drejt Shqipërisë.
Sipas dëshmisë, qytetarët shqiptarë, mes tyre fëmijë dhe gra, janë mbajtur të mbyllur në një autobus pa ajrim dhe hapësirë për të marrë frymë, ndërsa policia serbe dhe shoferi i autobusit qëndronin përballë duke parë pa ndërhyrë, pavarësisht thirrjeve për ndihmë.
“Kemi pritur më shumë se 1 orë e 20 minuta me dyer të mbyllura në një autobus plot me njerëz. Fillova nga paniku të hapja dritaret e sipërme të autobusit, por për shkak të temperaturave dhe turmës ishte e pamundur të merrje ajër. Fëmijët qanin, njerëzit filluan të qellonin xhamat me grushta, duke shpresuar se dikush do të na dëgjonte. Pamja më ç’njerëzore ishte kur policia dhe shoferi na shihnin ndërsa ne kërkonim ndihmë, por nuk bënin asgjë”, ka treguar një qytetare shqiptare.
Në një moment, vajza e saj 13-vjeçare mori pajisjen e emergjencës për thyerjen e xhamave dhe theu xhamin e derës, duke u dhënë mundësinë pasagjerëve të merrnin frymë pas një kohe të gjatë torture.
Por sipas denoncimit, skandali nuk mbaroi me kaq. Pas mbajtjes brutale në autobus, shqiptarët janë përballur me të njëjtën situatë edhe brenda avionit të “Air Serbia”, ku janë mbajtur sërish për një kohë të gjatë me dyer të mbyllura pa ajër, duke përjetuar ankth dhe frikë.
