Edhe këtë të premte anëtarë të PD-së dhe PL-së në Këshillin Bashkiak Tiranë si dhe qindra qytetarë protestuan para bashkisë Tiranë. Eksponentë politikë të PD-së bënë thirrje për dorëheqje të kryebashkiakut Erion Veliaj, duke e akuzuar atë se është i përfshirë në korrupsion.
Aktori Mehdi Malkaj iu bashkua sërish protestuesve para Bashkisë së Tiranës, kundër aferave korruptive të kryebashkiakut, Erion Veliaj. Që në nisje të fjalës së tij, mesazhin aktori e pati për kryeministrin Edi Rama, që nuk ngurroi ta quante një pervers, teksa iu referua një gjesti të tij rreth një vit më parë në qendër të Tiranës gjatë një aktiviteti me fëmijë të vegjël.
Ndërkaq, eksperti i ekonomisë pranë PD-së Dorian Teliti iu bëri thirrje qytetarëve që t’i thuhet “stop” korrupsionit, vjedhjes, shpopullimit, varfërisë, nëpërkëmbjes së pensionistëve. Në fund të tubimit, protestuesit qëlluan godinën e Bashkisë së Tiranës me sapun.
Prej disa kohësh, opozita proteston përpara Bashkisë së Tiranës, kundër korrupsionit në nivel lokal e qendror.
