Teksa Edi Rama ka filluar fushatën elektorale për zgjedhjet parlamentare 2025 me Diasporën, për Shqipërinë ka deleguar ministrat e qeverisë. Njëri premton rifillimin e procesit të rivlerësimit të pasurisë në vitin 2025, tjetra premton analizimin e çmimit të energjisë, një ditë pasi Eurostat publikoi se Shqipëria ka çmimin më të lartë të energjisë në Rajon. Rivlerësimi Në muajin shtator të këtij viti u premtua nisja e procesit të rivlerësimit të pasurive të paluajtshme. Por sot përfaqësues të Ministrisë së Financave deklaruan se reforma e caktimit të referencave të çmimit të pronave në të gjithë vendin nuk ka përfunduar ende. “Rivlerësimi i pasurive të paluajtshme do të bëhet paralelisht me caktimin e çmimeve të referencës për gjithë territorin e Shqipërisë, në mënyrë që të përfitojnë të gjithë. Është një proces që do të zgjasë përgjatë vitit të ardhshëm kur të bëhen referencat e reja”- u bë me dije në komisionet Parlamentare. Në një kohëq që vijojnë të mbeten peng mijëra prona vetëm që të mos paguajnë 15% tatim për diferencën midis vlerës së regjistruar të pronës dhe vlerës me të cilën është shitur kurse me rivlerësimin tatimi do të jetë më I ulët. Në një kohë që vetë kreu i qeverisë kishte deklaruar se në muajin shtator do bëhej procesi i rivlerësimit për një tatim prej 5%. Energjia Paralelisht me këtë Zëvendëskryeministrja, njëherësh Ministër i Infrastrukturës dhe Energjisë, Belinda Balluku, ishte në zyrat e OSHEE, ku inaguroi shërbimin CALL CENTER. Një vend akoma më shumë ku me siguri u punësuan dhjetëra të rinj e të reja, edhe kjo në prag të zgjedhjeve të ardhshme parlamentare. Teksa përuroi shërbimin, nënvizoi se po punohet “për të vlerësuar një ulje të çmimit të energjisë elektrike duke nisur nga 1 janari i vitit 2025. “Jemi në analizë e sipër, por jemi të sigurt që do i'a dalim dhe t’i ofrojmë shqiptarëve një çmim më të mirë për energjinë elektrike”, deklaroi Balluku. Të dyja këto nisma deklarohen qëllimisht se do bëhen në 2025, në mënyrë që herë pas herë t'ua përsërisin shqiptarëve si risi deri vitin e ardhshëm.
