Sot në orën 19:00 do të zhvillohet protesta e 23-të masive përpara Kryeministrisë, ku qytetarët do të rikthehen sërish para godinës së qeverisë për të kërkuar largimin e kabinetit qeveritar dhe dorëheqjen e menjëhershme të kryeministrit Edi Rama.
Ashtu si në protestën e një dite më parë, edhe këtë herë pritet një pjesëmarrje e gjerë e diasporës, me emigrantë që kanë mbërritur në Tiranë nën moton “Kur Shqipëria thërret, bijtë përgjigjen”.
Ky tubim shihet si kulmi i mobilizimit qytetar pas tre javësh protesta të pandërprera, duke shënuar një intensifikim të lëvizjes së nisur në rrugë.
Revolta, sipas organizatorëve, ka kaluar përmasat e një kauze të thjeshtë dhe është shndërruar në një lëvizje më të gjerë kundër korrupsionit, keqqeverisjes, mungesës së llogaridhënies dhe emigrimit të të rinjve. Pjesëmarrja e diasporës shihet si tregues se pakënaqësia ndaj qeverisë shtrihet edhe jashtë kufijve të vendit.
Tubimi do të nisë në orën 19:00 në sheshin “Skënderbej”, nga ku protestuesit më pas do të marshojnë drejt Kryeministrisë.
Dita e 23-të e protestave antiqeveritare konsiderohet një moment vendimtar për vijimësinë e lëvizjes qytetare, e cila prej javësh ka dominuar debatin politik në vend.
