Në një intervistë për mediat televizive, prindërit e Refik Buzit, autorit të ngjarjes së rëndë në Vidhisht të Roskovecit, kanë deklaruar se djali i tyre kishte përplasje me ish-të fejuarën dhe prindërit e saj për çështje parash.
Sipas tyre, 35-vjeçari ka qenë i fejuar për 9 vite me Rozalinda Plakën dhe se përgjatë thuajse një dekade, ai i dërgonte para për shkak se punonte si emigrant në Britaninë e Madhe.
Sipas tyre bëhet fjalë për një shumë të konsiderueshme parash, rreth 180 mijë paund, që nuk i janë kthyer dhe kjo ka sjellë edhe përplasjen mes tyre dhe ndarjen.
“Po bënte 3 vite që ishte kthyer në Shqipëri. Mbrëmë në shtëpi. U ngrit herët në mëngjes, mori dhe çiften pas dere. Kur erdhi policia këtu, na kërkoi çiften, e pamë nuk ishte. Ai ishte në hall të madh. I kemi rënë disa herë në telefon djalit dhe nuk e ka hapur”, tha nëna e 35-vjeçarit.
Ndërkohë, familja e vajzës pretendon se vajza kërcënohej në mënyrë të vazhdueshme nga 35-vjeçari dhe kishte marrë urdhër mbrojtjeje. Ata shpjegojnë se Rozalinda vazhdonte studimet në degën e Mjekësisë dhe ish-i fejuari kishte shkuar disa herë dhe e kishte kërcënuar. Ai ishte shoqëruar disa herë në polici, por më pas ishte liruar.
