Thellohet edhe më tej skandali në Komisariatin nr. 2 në Tiranë, pas arrestimit të ish-specialit të RENEA-s, Altin Morina. Pas transferimit të shefit të krimeve dhe dorëheqjes së shefit të komisariatit, edhe efektivja e Patrullës, që së bashku me kolegët prangosi të shumëkërkuarin e SPAK, ka dhënë dorëheqjen. Skandali i shkrirjes së kupolës së një prej komisariateve më me peshë në Tiranë, për shkak të zonës që mbulon, po kalon thuajse në heshtje të plotë. Mediat e kanë injoruar ngjarjen, ndërsa zyrtarisht Policia e Shtetit nuk ka bërë transparencë.
VNA, duke hulumtuar rreth rastit, ka mësuar edhe detaje lidhur me arrestimin e Morinës, që u bë shkak për largimet apo dorëheqjet në komisariat. Efektivët e Komisariatit nr. 2, pasi marrin informacion se Morina kishte hyrë në banesën e tij, informojnë eprorët dhe nisin aksionin. Në momentin që i kërkuari del nga shtëpia e tij, policia e ndalon te ish-stadiumi Dinamo. Morina kërkon që ata ta lënë të shkojë, pasi është “një prej tyre”, por efektivët nuk e lejojnë dhe i vënë prangat.
Kjo nuk është pritur mirë nga një grup drejtuesish brenda Policisë së Shtetit, të cilët kanë nisur revanshin ndaj Komisariatit nr. 2, duke detyruar të japin dorëheqjen disa prej tyre dhe duke transferuar disa të tjerë.
Deri më tani për këtë ngjarje të rëndë nuk ka patur asnjë reagim as nga drejtori i përgjithshëm i policisë Ilir Proda, nga ministri apo nga opozita
