Federata e Futbollit të Shteteve të Bashkuara ka njoftuar zyrtarisht rinovimin e kontratës me Mauricio Pochettinon, i cili do të vazhdojë të jetë trajner i kombëtares amerikane deri në Kupën e Botës 2030.
Federata amerikane e cilësoi marrëveshjen e re si “një kapitull të ri” në projektin për zhvillimin e ekipit kombëtar të meshkujve, duke i dhënë Pochettinos dhe stafit të tij mundësinë për të vijuar punën dhe për të pasur një ndikim më të madh në futbollin amerikan.
“Mauricio dhe stafi i tij besojnë në të ardhmen e futbollit në Shtetet e Bashkuara dhe projekti ynë i ri na lejon të ndërtojmë mbi përparimin e kombëtares së meshkujve të SHBA-së dhe hovin e futbollit amerikan”, deklaroi drejtori ekzekutiv dhe sekretari i përgjithshëm i Federatës së Futbollit të SHBA-së, JT Batson.
Nga ana e tij, trajneri argjentinas u shpreh optimist për të ardhmen e ekipit amerikan, duke theksuar potencialin e madh të futbollit në SHBA.
“Pasioni që përjetuam nga tifozët gjatë gjithë Kupës së Botës vetëm sa forcoi besimin tonë në atë që është e mundur këtu. Jemi të emocionuar për mundësinë që të sjellim gjithë përvojën dhe njohuritë tona për të ndihmuar në forcimin e rrugëve për lojtarët, trajnerët dhe ekipet në të gjithë Federatën”, tha Pochettino.
I emëruar në krye të kombëtares amerikane në vitin 2024, ish-trajneri i Tottenhamit, Paris Saint-Germain dhe Chelsea ka vendosur rekorde historike me SHBA-në për numrin e fitoreve dhe golave të shënuar në Kupën e Botës 2026.
Me këtë rinovim, Federata amerikane synon të ndërtojë një projekt afatgjatë me objektiv zhvillimin e mëtejshëm të kombëtares dhe rritjen e rolit të SHBA-së në futbollin ndërkombëtar përpara Botërorit 2030.
