Policia ka arrestuar 18 persona në lidhje me protestën e zhvilluar ditën e sotme para Kuvendit, e cila u shoqërua me incidente dhe tensione në zonën përreth godinës parlamentare.
Sipas autoriteteve, protestuesit kanë shkaktuar përplasje dhe dëme materiale, përfshirë edhe dëmtimin e disa automjeteve të policisë. Si pasojë e situatës së krijuar, 9 efektivë policie kanë mbetur të lënduar dhe po marrin trajtim mjekësor.
Gjatë zhvillimeve në terren, policia ka ndërhyrë për shpërndarjen e turmës, duke përdorur gaz lotsjellës. Ndërkohë, forcat e rendit kanë mundësuar edhe daljen e deputetëve nga ambientet e Kuvendit pas përfundimit të seancës plenare.
Në protestë janë raportuar edhe persona të lënduar nga radhët e protestuesve, të cilëve u është ofruar ndihma e parë mjekësore nga autoambulancat e pranishme pranë zonës së Parlamentit.
