Hasan Ferracaku, një nga personat e akuzuar si autor i masakrës së Velipojës, është arratisur nga masa e sigurisë “arrest në shtëpi”, ku ndodhej pasi i kishin përfunduar afatet maksimale të paraburgimit.
Sipas informacioneve paraprake, Ferracaku nuk është gjetur në banesën ku duhej të qëndronte në zbatim të vendimit të gjykatës. Autoritetet kanë nisur kërkimet për lokalizimin dhe kapjen e tij.
Ferracaku akuzohet për përfshirje në atë që njihet si masakra e Velipojës, një nga ngjarjet më të rënda kriminale të viteve të fundit. Në përplasjen me armë, e shkaktuar nga konflikti për administrimin e biznesit të shezllongeve në plazh, mbetën të vrarë katër persona: Kujtim Ferracaku, 59 vjeç, Xhovani Gocaj, 25 vjeç, Edmond Gocaj, 38 vjeç, dhe Musaen Zeneli.
Arratisja e tij ngre pikëpyetje serioze mbi funksionimin e mekanizmave të kontrollit për personat që ndodhen në arrest shtëpie. Ngjarja vjen vetëm pak javë pasi në Policinë e Shkodrës u kryen ndryshime në drejtim, një periudhë e shoqëruar me vështirësi në organizimin dhe funksionimin e strukturave drejtuese. Largimi i një të pandehuri të profilit të lartë nga masa e sigurisë pritet të sjellë verifikime për përgjegjësitë institucionale dhe mënyrën si është ushtruar mbikëqyrja ndaj tij.
