Ambasada e Shteteve të Bashkuara në Tiranë ka shpërndarë një deklaratë të Sekretarit amerikan të Shtetit, Marco Rubio, i cili e lidh fuqinë e një shteti me ekonominë, prodhimin vendas, kontrollin e kufijve dhe sigurinë energjetike.
“Një vend që nuk është në gjendje të ndërtojë anije, të prodhojë ilaçe, të kontrollojë imigracionin ose të sigurojë qasje në burimet jetike, nuk mund të mbrojë popullin e tij, nuk mund të mbrojë interesat e tij dhe nuk mund të mbrojë mënyrën e tij të jetesës”, shprehet Rubio.
Por nëse mesazhi amerikan vendoset përballë realitetit shqiptar, kontrasti është i vështirë të mos vihet re.
Shqipëria nuk prodhon pothuajse asnjë nga ato që përmend Rubio si tregues të fuqisë së një shteti. Nuk ndërton anije, nuk prodhon barna që konsumon në masën e nevojshme dhe mbështetet ndjeshëm te importet për një pjesë të madhe të produkteve dhe burimeve që përdor.
Edhe sektori që tradicionalisht është konsideruar si një prej bazave të prodhimit vendas, bujqësia, po përballet me rënie dhe vështirësi të vazhdueshme, sipas të dhënave zyrtare.
Në këto kushte, mesazhi i Rubio-s tingëllon disi i hidhur kur lexohet nga Shqipëria.
