Biznesmeni Ilir Shtufi nën hetim nga SPAK për kullën shumëkatëshe "Mali i Tiranës", rezulton të jetë një nga emrat më të favorizuar nga institucionet shtetërore për shkak se ka mundur që në 5 vitet e fundit të ketë marrë disa leje ndërtimi si dhe statusin e investitorit strategjik.
Referuar dokumentave rezulton se kompania “Nova construction 2012” ka marrë leje në 2017 për godinë polifunksionale 2, 4, 16 dhe 25 kate Garden Building”.
Dy vite më vonë, kjo kompani ka marrë një tjetër leje ndërtimi për objektin “Godinë polifunksionale 13 katë mbitokë dhe 3 kate nëntokë” në rrugën Mine Peza. Në 2021 është pajisur me leje për objektin “Godinë banimi, hoteleri dhe shërbimesh 16 dhe 17 kate me 5 kate nëntokë.
Ndërkohe që në 2022, ka marrë leje për ndërtimin e një tjetër objecti, godinë banimi shërbimi dhe hoteleri 1-4 dhe 8-16 kate dhe me 4 kate nëntokë” në Rrugën Dritan Hoxha.
Më 8 mars 2023, siguron leje për ndërtim objekti “Godinë multifunksionale shërbime, hoteleri dhe banimi” me vendodhje në Rrugën e Barrikadave në Bashkinë Tiranë.
Në 2023, konkretisht me vendimin nr. 29 / 4, datë 01 / 02 / 2023 Komiteti i Investimeve Strategjike miratoi statusin e investitorit strategjik për projektin e investimit “Green House Korça Resort”, me zhvillues shoqërinë Investment and Development Albania, në pronësi të Gerian Kuka, Ilir Shtufi dhe Agim Zeqo.
Gerian Kuka rezulton i lidhur me ish –zëvendës kryeministrin Arben Ahmetaj,sikurse Ilir Shtufi, për shkak se kompanitë e këtij të fundit kanë përfituar 84 milionë euro projekte të lidhura me rindërtimin kur ky i fundit ishte Ministër.
Ilir Shtufi rezulton po ashtu të jetë bashkëpronar në disa shoqëri, të cilat kanë fituar licenca në fushën e energjisë dhe projekteve fotovoltaike. Të gjitha këto leje ndërtimi dhe licenca janë duke kaluar në sitën e SPAK për të parë lidhjet e këtyre biznesmenëve me njerëz të politikës.
