Baton Haxhiu është shfaqur dje në dyert e SPAK duke dhënë pak ose aspak detaje për motivin që e detyroi të hynte në zyrat e Prokurorisë së Posaçme.
Edhe pse është e qartë që nuk ka qenë për të intervistuar ndonjë prokuror, ajo që mësohet deri më tani është se çështja Meta dhe hetimet drejt përfundimit për këtë të fundit kanë qenë arsyeja e thirrjes së Baton Haxhiut në Spak.
Dikur miq e bashkëpunëtorë dhe vitet e fundit kundërshtarë të fortë, Meta dhe Haxhiu kanë fatura të paqarta për kohën kur frekuentoheshin rregullisht. Konkretisht bëhet fjalë për një vilë në zonën e Qerretit, dikur pronë e familjes së Ilir Metës e shitur rreth viteve 2005-2007 Zamir Manes me shumëfishin e vlerës me të cilën është blerë.
Dhe ky i fundit ja ka rishitur Baton Haxhiut me vlerë më të ulët se ajo që i ka paguar Ilir Metës. Duket se transaksionet e dyshimta në shitblerjen e vilës kanë qenë një nga temat kryesore për te cilat Baton Haxhiu ka dhënë shpjegime. Pa harruar që për këtë çështje (por dhe për të tjera) në dyert e Spak është shfaqur më shumë se njëherë dhe biznesmeni Samir Mane.
Tashmë shpjegimet e kërkuara nga prokurorët e Spak për çështjet e hetimit pasuror të politikanëve kanë një spektër të gjerë ku veç biznemenëve përfshihen dhe figura të rëndësishme të medias.
