Gati 4 muaj pas vetëvrasjes së Sibela Abedinit, ku si shkak shërbeu një foto e saj intime e shpërndarë në rrjetet sociale, prokuroria e Tiranës ka vendosur t’i kërkojë ndihmë rrjetit social Tik Tok, një platforme që në Shqipëri po përdoret më së shumti për denigrimin e personave të ndryshëm. VNA ka siguruar vendimin e gjykatës së Tiranës e cila kërkon që të detyrohet shoqëria Tik-Tok me adresë Tiktok Pte, Limited, 1 Raflles Quay, South Tower Singapore për paraqitjen në formë elektronike e të dhënave kompjuterike që lidhen me regjistrimin e dy adresave, në të cilët është shpërndarë fotoja e nënës së 1 fëmije, cka i shkaktoi stres të vazhdueshëm psikologjik duke e cuar drejt vetëvrasjes.
Gjykata urdhëron rrjetin social tik tok të vërë në dispozicion emrin e personit, mbiemrin, adresën, numrin e telefonit dhe cdo të dhënë tjetër që mund të ndihmojë për identifikimin e “pronarit” të faqes së tik tok.
Vendimi i është dërguar Njësisë C, Hetimi i Krimeve Kompjuterike për zbatim. Sibela Abedini, nënë e një fëmije të mitur, në process divorci më bashkëshortin e saj, shtetas të Kosovës, u hodh nga tarraca e një pallati në Kamzë, duke i dhënë fund jetës.
Policia arrestoi si të dyshuar për shkaktim të vetëvrasjes Altin Çokun, një përdorues i rrjetit social që ndiqej nga qindra persona. Nga hetimet rezultoi se gruaja i kishte bërë kërkesa të vazhdueshme Çokut për ta hequr foton nga rrjeti social, pasi po përjetonte një gjendje të rëndë psikologjike, por askush nuk e kishte dëgjuar, derisa ajo kreu aktin e vetëflijimit.
Çoku kërkoi pak ditë më parë zëvendësimin e masës së sigurisë në gjykatë, por iu rrëzuan të gjitha argumentat. Ai ishte një emër i njohur për policinë, për shkak të rekordeve të mëparshme, si shantazhe e gjobëvënie.
