Në një kohë kur protestat e të rinjve kanë përfshirë Shqipërinë dhe disa vende europiane, Papa Leoni XIV ka përcjellë një mesazh për mënyrën se si shoqëria duhet t’i kuptojë adoleshentët, pasiguritë dhe sjelljet e tyre shpesh sfiduese.
“Pas koracës që shumë adoleshentë ndërtojnë për të mos vuajtur, fshihet dëshira për të dashur dhe për t’u dashur”, deklaroi Papa gjatë një takimi ndërkombëtar kushtuar edukimit në shkolla dhe universitete, raporton La Repubblica.
Ati i Shenjtë foli për një brez që përballet me vetminë, familjet e lënduara dhe frikën nga e ardhmja.
“Sa shumë studentë jetojnë në kushte shqetësimi ekzistencial! Familje të lënduara, vetmi digjitale, ndjenja pamjaftueshmërie apo frikë përballë një të ardhmeje që duket e pasigurt”, u shpreh ai.
Papa kritikoi edhe presionin e vazhdueshëm për sukses, që sipas tij po i paralizon shumë të rinj.
“Jetojmë në një kulturë të performancës që vazhdimisht krahason dhe klasifikon, ndonjëherë në mënyrë të pamëshirshme. Një meritokraci e keqkuptuar përfundon duke mos respektuar njerëzit. Për këtë arsye, shumë të rinj heqin dorë ende pa u përpjekur.”
Ai kërkoi që shkollat dhe universitetet të jenë vende ku të rinjtë ndihen të mirëpritur, ku dikush ua mban mend emrin, vëren mungesën e tyre dhe gëzohet kur kthehen.
Megjithëse Papa nuk iu referua drejtpërdrejt protestave në Shqipëri, Itali apo Francë, mesazhi i tij vjen në një moment kur debati publik është përqendruar te dhuna, përplasjet me policinë dhe përgjegjësia e të rinjve.
Fjalët e tij sjellin në vëmendje edhe një pyetje tjetër: sa përpiqen institucionet t’i kuptojnë të rinjtë, përpara se t’i gjykojnë për mënyrën se si reagojnë?
Burimi: La Repubblica, 22 tetor 2026.
