Ndërsa në PD ka ende njerëz që debatojnë për drejtuesit politikë të qarqeve (siç ishte rasti i Lezhës), në PS, siç e do tradita, askush nuk reagon dhe ata që dorëzojnë detyrën largohen në qetësi.
Kjo ka ndodhur edhe me Elisa Spiropalin, e cila i ka dorëzuar detyrën e drejtueses së qarkut të Shkodrës Benet Becit. Kryetari aktual i Bashkisë së Shkodrës do të drejtojë qarkun, ku me gjasë Edi Rama do të jetë në listën e kandidatëve për deputetë. Beteja për Shkodrën duket se do të jetë e fortë, jo vetëm sepse Shkodra është bastion i djathtë, por edhe për faktin se Tom Doshi dhe partia e tij kanë marrë shumë pushtet dhe sigurisht kanë "oreks" të madh.
Edi Rama do të përpiqet të lërë në hije aleatin e tij (të shpallur non grata nga SHBA) për të grumbulluar, si gjithmonë, sa më shumë pushtet në duart e tij. Partia Socialdemokrate e Tom Doshit mori 3 mandate në zgjedhjet e kaluara, një numër i lartë për një parti thuajse inekzistente.
