Pas thuajse dy javësh në betejë për dosjen e SPAK për familjen Berisha, PD ka nisur të organizohet për fushatën e zgjedhjeve të ardhshme. Gaz Bardhi, Ervin Salianji apo ndonjë tjetër kanë nisur takimet në bazë, ndërsa Sekretari i Përgjithshëm i kësaj partie, Flamur Noka, ka prezantuar në Lezhë drejtuesin politik të qarkut, Agron Gjekmarkaj.
Por duket se demokratët e Lezhës nuk e kanë mirëpritur zotin Gjekmarkaj si drejtues. Ish-numri dy i PD gjatë kohës kur kjo parti drejtohej nga Lulzim Basha duket se nuk i bind lezhjanët se është figura e duhur për të marrë rezultatet e dëshiruara në zgjedhjet e ardhshme. Në mbledhjen e prezantimit ka pasur kundërshti të forta lidhur me emërimin e zotit Gjekmarkaj. VNA ka siguruar një nga momentet kur një anëtar i kryesisë së PD në Lezhë nuk e pranon kandidaturën e Agron Gjekmarkajt, aq më tepër (siç thotë ai) që me listat e mbyllura, kjo do të thotë se interesi për të bërë fushatë do të jetë zero.
